Ua ave i le tulafono e se tasi alii pilionea mai Lusia le minisita o le va i fafo a Ausetalia, Penny Wong ona o nisi o sā sa faia i le osofa’ia ai e Lusia o Ukraine, fai mai a ia o ia sā ua matua’i aafia ai lona ta’uleleia.  

O Alexander Abramov ua ia ta’ua o le faia e Ausetalia o sā nei poo sanctions faasaga ia Lusia ma ana uo ua aafia tele ai o ia ma ua tele tupe ua lusi ai. 

Fai mai lana finau ua tatau ona aveese loa nei sā ma e lē talafeagai le gaioiga sa faatino e le minisita auā ua aafia atu ai foi ma lana kamupani ma ana pisinisi tau uamea.  

O loo ta’ua i le lipoti o le sā sa tuuina i luga o Lusia ma le militeli faapea sui o pisinisi ma le malo. O loo tulai le loia o Brendan Lim mo le tamaitai minisita i le mataupu lea ma o le a silasila foi i se talosaga e taofia ai le faailoaina faalaua’itele o faamaumauga ma pepa o faamatalaga ma o le aso 26 o le masina nei e toe fofogaina ai le mataupu lea i le faamasinoga.