Ua lipotia mai nei e le leitio faavaomalo a Niu Sila, le alu ai o se solotetee a foma’i sinia o falema’i.
Faamauina le oo atu lava i le 5000 o foma’i sinia ua aga’i mo lea faamoemoe, ma e ta’ua e 24 itula le umi o le a faia ai lenei solotetee.
Ae mai le Ofisa o le Soifua Mālōlōina, le Health NZ, e iai lava le avanoa e tolopō ai le oo atu i le 4,300 o ta’otoga na fuafua e faatino.
I lipoti o loo ta’ua ai ua aafia le tele o galuega faatino aemaise o gasegase o loo autovaa atu mo fesoasoani ona o le to’aitiiti o tagata o loo galulue i falema’i.
Ua māua i lipotii, ua aga’i le to’atele o nei foma’i e solotetee ona i le latou maitau, o loo faatuai lava e Ofisa o le Soifua Mālōlōina, le NZ Health, le talanoaina o siitaga o o latou totogi.
Ae o le finau a le Ofisa o le Soifua Mālōlōina, e tonu ma ua talafeagai lelei le latou ofa mo totogi o foma’i.
Ma ua faailo ai lo latou faanoanoa tele ona ua tauau ina faatuatuana’i ai le vaaiga o gasegase o loo aga’i atu mo ni fesoasoani i falema’i.
E ui i le finau a le NZ Health, peita’i ua faamanino e le Asosi ua ta’ua o le Association of Salaried Medical Specialists (ASMS), o loo finau foma’i nei mo le lumana’i o le soifua mālōlōina lautele ona ua tauau ina oo i se tulaga faaletonu, ona e lē o mafai ona sa’ili mai ni foma’i, ma ua lē faatumauina le fiafia ma le fia nofo o se foma’i talu ai le maualalo tele o nei totogi o loo ofoina atu.
Ua faamauina i lipoti, o le to’atele ua faatalanoina e sui mai Ausetalia, ma ua ta’ua ai e nisi e faatoluina ma faafāina le telē o le totogi o le foma’i e maua i Ausetalia nai lo o le totogi o loo maua i Niu Sila.
O le naunauta’iga, ia maua e le NZ Health le agaga o le taumafai malosi e fai se auala, e fia nonofo ai foma’i i Niu Sila, ma o le iloilo lelei o totogi o se auala aupito sili lea ona tāua pe a manana’o e faatumauina pea le galulue o tagata nei i falema’i o le atunuu.
Puna o Faamatalaga: https://www.stuff.co.nz/politics/360671964/what-you-need-know-about-todays-health-workers-strike
