Ua aumai le iuga a le Faamasinoga o Fanua ma Suafa, sa toe iloiloina ai lenei mataupu, i le talosaga a matai o le afioaga o Afega, na latou talosagaina ai ina ia soloia ma faalēaogāina le nofo a Savea Porotesano Malifa i le suafa Gatoaitele o Afega.

O le Aso Lua, 21 o Novema o le tausaga lenei 2023 na iloiloina ai lenei mataupu, ae o le Aso Faraile, 8 o Tesema na faia ai le faaiuga ua talia ai e le faamasinoga le talosaga ma ua soloia ma faalēaogāina ai nei le suafa Gatoaitele mai le afioga ia Savea Sano Malifa.

O le laulau poo faamasino sa nafa ma le fetuunaiga ma le faatinoina o le mataupu lenei, sa aofia ai le susuga ia Leaupepe Fatu Pula, le afioga ia Folasā Sakaria Taituave, ma le afioga ia Iuli Sefo Fautuaalii.

O le itu talosaga e silia ma le luasefulu matai o le afioaga o Afega, ae o le itu tetee na tulai ai Saena Tialino Penaia II, Fata Ueli, Fata Leaoga, ma Fata Ryan Schuster.

E tele vaega tāua sa tolaulau mai le iloiloina o lenei mataupu, o vaega sa laga mai e le Itu Talosaga e lagolago ai la latou mau ma na tali atu foi le Itu Tetee ina ua fesiligia e afioga i faamasino.

O mau a le Itu Talosaga, e leai se Gatoaitele i Faalupega o Afega, ma e leai foi se matai e suafa ia Gatoaitele i le nuu o Afega, ma o le taimi na fai ai le saofai a Savea i le suafa Gatoaitele ia Iuni o le 2014, o le taimi lea o loo totua le Itu Tetee mai le faiganuu a Afega talu mai le tausaga e 2012, ina ua fai le nuu o Savea ma Pito Faalogo.

O le aso 9 o Iuni 2014 na tu ai le tootoo o le nuu e logoina le Itu Tetee ina ia taofia le faatinoina o le saofai a Savea i le suafa Gatoaitele lea sa fuafua e faatino, auā e taofi le Itu Talosaga, o le Faaiuga a le Faamasinoga i le aso 31 o Mati 2014 o loo tumau ai le nuu i le mea sa masani ai, a o lei faatinoa le saofai a Savea i le suafa Gatoaitele ia Iuni o le 2014.

Ma ina ua faatino le saofai, e lei usu Alii ma Faipule o Afega i le nofo, ma o matai sa auai, o matai o le nuu sa totua ma le faiganuu, faapea matai mai isi nuu.

O le mau a le Itu Tetee, e lē tau faanoi i le nuu suli ma le aiga mo le faatinoina o se faamoemoe ua autasi uma iai suli, ae i le maitau a le Faamasinoga i lea finagalo o Saena faapea e lē tau faanoi suli i se nuu, o la sa iai isi matai o le nuu e faamamalu le faamoemoe o le aiga, ta’ua e le Faamasinoga, o se mau faapa’ia mata, faatupu maseiga i nuu ma aiga, ma e na o nuu malepelepe e taunuu iai.

O Fata Leone na lauga e faapaia le Nofo, o Saena Penaia II na e’eina pāpā o le Gatoaitele, ma sa auai mai foi matai o isi pitonuu.

Sa lei faafinauina e le Itu Tetee sa tu le tootoo o le nuu ina ia taofia le nofo a Savea, ma ina ua fesiligia Saena pe talafeagai i le aganuu ma lona faaaogāina le faatino e se aiga o totua ma le nuu se saofai, ae na tali Saena, e lē talafefagai, ma na ia ta’ua foi e lē talafeagai ona faatino e se matai mai se isi nuu le e’eina o pāpā o le nofo a se isi nuu.

O le mau a Saena, o ia na e’eina Pāpā o le Gatoaitele ia Savea, e lē o le suafa Gatoaitele na faatino, ae o Pāpā na ia e’eina ia Savea, peitai i le maitau a le Faamasinoga, e feteena’i lea mau ma le suafa Gatoaitele o Savea lea na lesitalaina i le aso 8/4/2016.

O le iloiloina o nei vaega e pei ona lāgā e le Itu Talosaga ma tali mai foi le Itu Tetee, na oo ai le laulau a faamasino i le faaiuga ma folasia mafuaaga.

E manino le autu o lenei suesuega e faaaogā iai aganuu ma agaifanua ma le Tulafono e faasino i aganuu ma agaifanua, ma i le vaai a le Faamasinoga, na totua Savea Porotesano ma lona aiga mai le faiganuu a Afega i le tausaga e 2012.

Ua faamalieina le faamasinoga, e lei aliitaeao ma usu faaaloalo Alii ma Faipule o Afega i le saofai a Savea Porotesano Malifa, ona sa solitu le nuu e tusa o mafuaaga ua faailoa, o Tu ia ma Agaifanua masani o loo tausi mamalu iai nuu, o lona uiga, a solitu se nuu, e tatau ona taofi se faammoemoe o se aiga ae toe laolao le mataupu ma soālepule ina ia manino ma malamalama auā e lē po pea se nuu.

Ua faamalieina le suesuega, o le teena o le suafa Gatoaitele, ona o se matai fou, e leai sona faalupega, leai se pou i le saofa’iga ma ua uma ona tofi le nuu o Afega, ma a fua i le Malietoa Laauli o le lona 14 o augā nofo i le Malietoa poo le tausaga e 1600, e suli mai ai Gatoaitele, ae faatoa faatino ai se suafa matai i le 2014, o lona uiga ua 414 tausaga, ma o le vaivai lea o le finagau a le Itu Tetee, ae talia ai le finagau a le Itu Talosaga, o le suafa Gatoaitele o se matai fou, ae o loo matamata tetele le faalupega o Afega, “Susū mai Fata ma Maulolo ma lo lua fale na taitai o tuotuo o le Gatoaitele.”

Ua poloaiina nei le lesitala o le faamasinoga ina ia tuueseina le suafa o Gatoaitele o Savea Porotesano Malifa mai le Lesitala o Matai Samoa.

Na saini ai i lenei faasilasilaga le afioga i alii faamasino e toatolu na taulimaina lenei mataupu, Susuga Leaupepe Fatu Pula (Peresetene Lagolago), Afioga Folasā Sakaria Taituave (Alii Faamasino), Afioga Iuli Sefo Fautuaalii (Alii Faamasino).