E faitau selau le au tetee na aga’i ane i Ueligitone o se vaega o se solo tetee na faia faasaga i le malo e ta’ita’ia e le ta’ita’i o le Destiny Church Brian Tamaki.
Ua mae’a le solo tetee ma amata aga’i ese nisi na auai ai ma sa faailoa e Tamaki i le One News o se aso lelei tele lenei ae sa faailoa e le palemia Jacinda Ardern e foliga mai o se solo tetee filemu sa faatinoina ma e foliga sa faatalitalia se numera tele peitai e to’aitiiti na auai atu.
O le ta’uta’u ai o le solo tetee lenei na amata tapuni mai ai lava i le Aso Sa auala latalata i le maota fono a o tapena leoleoga ma pa e puipui ai le Palemene ina ia aua ne’i toe faaluaina le tetee umi na matua’i faaleagaina ai lea nofoaga i le masina o Fepuari.
Saunoa le ta’ita’i o le atunuu, Jacinda Ardern e talileleia e le Palemene solo tetee e filemu ma usitaia tulafono, ma o le aiātatau foi lea a tagatanuu Niu Sila.
Peitai i le feiloa’iga a le Palemia ma tusitala i le Aso Gafua na ia faaalia ai e lē o iai sona faamoemoe e feiloa’i ma le au tetee.
E iai fale faigaluega faapea a’oga sa fautuaina le galulue ma a’ooga mai i o latou fale i le aso ananafi ona o le a tumutumu le taulaga.
Na lipotia foi e le stuff.co.nz le faalauiloa e Tamaki o se vaega faaupufai fou i lea faatasiga ma o lea pati o le a auai faatasi ma le pati a le New Nation ma le Outdoors Party e pei ona ta’ua i le lipoti ma ua fautuaina foi le faipule o le Leipa ua faate’a nei Gaurav Sharma ina ia fesootai ane.
