Ua tele upu faamanuia faapea sā’afi’afiga ua faia i luga o upega tafa’ilagi mo le alii taalo lakapi o Ardie Savea.
O le faatinoga e sa’afi ma patipatia ai lea alo o Samoa i ana taumafaiga i le taaloga lakapi i lenei tausaga e 2025.
Ua avea ai nei Savea ma se tasi o tagata iloga i lea fā’agatama, ina ua suipi lea alii i le tele o faailoga i le tufatufaga faailoga a le New Zealand Rugby Awards.
I lipoti, na faamauina ai le manumālō o Ardie Savea i le faailoga o le tama taalo o le ‘au a le Olopeleki, le All Blacks Player of the Year; o le Super Rugby Pacific Player of the Year ma se tasi o faailoga taualoa maualuga ma maoa’e o le Kelvin R Tremain Memorial Player of the Year.
O se tala fiafia le amana’ia ai o le alo o Samoa i nei faailoga ma ua ogatasi foi ma le atoa ai o le 100 o taaloga ua ia taalo ai poo le 100th Test milestone.
Faaalia ua atagia ai foi tulaga maoa’e o le taumafai a lenei alii i le taaloga i tulaga faavaomalo ae faapea taaloga o le Super Rugby.
Faaalia e le Ofisa Sili o le NZR, CEO Mark Robinson, ua alagātatau le maua ai e Savea o nei faailoga, ona o loo galue ma le malosi Savea, ma ua atagia ai foi lona tagata ma le ituaiga ta’ita’i o iai lea alii Samoa.
Puna o Faamatalaga: https://www.rnz.co.nz/news/sport/581595/ardie-savea-reigns-supreme-at-new-zealand-rugby-awards
