Ua matauina le siitia pea o le numera o i latou o loo tuli faasalaga i le Falepuipui i Tanumalala ua aafia i le siama o le Koviti-19 e pei ona ripotia mai e le Sui Komesina o le Matagaluega Leoleo ma Falepuipui lea ua silia nei ma le to’a 47 pagota ua aafia i le siama.
E oo foi i leoleo o loo galulue i le toese ua silia i le to’a 50 ua maua i le faama’i. Faaalia e Auapaau Logoitino Filipo ua faaaoga nisi o sela o le falepuipui e faanofoesea ai pagota ua maua i suesuega ua aafia i le faama’i ae o le toatele lava e leai ni auga o aliali mai ai.
I le suesuega a leoleo i le taumafai ai o nisi o pagota e sosola ese ma le falepuipui i le masina na tea nei e to’a 18 pagota ua molia ai i solitulafono e aofia ai le umia o ni auupega matautia e pei o agaese ma u’amea ma ua molia foi i le taupulepule e faatino se gaioiga solitulafono ma moliaga e taumafai e sosola ese ma le falepuipui.
O loo fuafua o le vaiaso fou e tūtūla’i ai i latou i luma o le faamasinoga e tali o latou moliaga.
