A o sauni ai le toe amatalia o a’oa’oga i lenei tausaga, o lea ua faaalia le matua’i telē o le numera o avanoa faafaia’oga ma ulua’oga e lē o iai nisi o faatumuina.
I lipoti mai le Newstalk ZB, e oo atu lava i le 445 avanoa e lē o iai ni faia’oga ma ulua’oga o faatumuina i totonu o Aotearoa nei, 12% ua maualuga atu ai nai lo le tausaga talu ai, e tusa ai ma faamaumauga ma faamatalaga mai le Education Gazette.
O ia avanoa e aofia ai:
- 44 avanoa o Ulua’oga ma nisi o avanoa sinia,
- 164 avanoa o Faia’oga mo A’oga Amata,
- 107 avanoa faigaluega i A’oga Tulagalua,
- 132 avanoa faigaluega i A’oga Maualuluga.
O le 75% o ia avanoa faigaluega o loo i totonu o North Island, e pei ona oo atu lava i le 125 avanoa mo Aukilani lava ia.
E le’i mamao atu ona iai faamatalaga na tuuina mai a le Matāgaluega o A’oga e tusa ai ma le pa’ū o le numera o faia’oga i le 1,250.
Ae faaalia e le Matāgaluega, le siitia pea o le numera i totonu o potu a’oga i tausaga uma, o le latou iloa i le isi 3 tausaga ua moomia e a’oga le oo atu i le 1,550 o faia’oga o a’oga tulagalua, ae 1,035 faia’oga mo a’oga maualuluga poo kolisi.
Faamanino e le ta’ita’ifono o le laulauafono mo Ulua’oga o A’oga Maualuluga – Secondary Principals Council, ia Steve McCracken, o feutaga’iga lava ma talanoaga i totogi, o se tasi lea o matāupu o loo finauina pea.
O le isi vaega tāua, o le faigatā lea ona sa’ili o faia’oga i le matātā o le Matematika ma le matāupu faasaienisi o le Physics, e pei ona iai le 13% o avanoa e le’i faatumuina.
Talu ai nei matāupu o lea ua faaalia manino ai foi e le Peresitene PPTA poo le Post Primary Teachers’ Association popolega i le maualuga o le numera o faia’oga e lē o iai, ma ua fautuaina ai a’oga eseese ina ia faia iai se fuafuaga, ona o popolega o le tele o suiga i ta’iala o a’oa’oga poo le curriculum.
Ae ui i nei faafitauli, o lea ua faamanino e ta’ita’i ma le to’atele o a’oga lo latou galulue pea e tuuina atu le tau’au e fesoasoani i fanau a’oga.
Puna o Faamatalaga: https://www.newstalkzb.co.nz/news/national/auckland-schools-hit-hardest-as-445-teacher-roles-sit-vacant-nationwide/
