O le pese ua faaigoaina o le “Monsters” na faaaoga e Iam Tongi e tauva ai mo sona avanoa e alu ai i Hollywood mo le American Idol i lenei tausaga ma na molimoli faapitoa ai ona alofaaga i lona tamā ua fai i lagi le folauga. 

O Iam Tongi o se alii e mai tupuaga Samoa, Tonga & Caucasian pe a fua atu i lana Biography i luga o le Tiktok ma na matua’i nutimomoia ai loto o faamasino a lea polokalame pese ina ua usuina e lea alii talavou le pese a James Blunt. 

O nai masina ua tuanai na faailoa e Iam i luga o le American Idol na maliu lona tamā ma o se tasi lenei o vaega tāua o le laua mafutaga ma lona tamā ia Rodney o le musika. 

E 18 tausaga le matua o Iam ma na ola a’e o ia i Hawaii, tolu tausaga talu ai na me’i loa ma lona aiga i Seattle. O le tāua o le pese na usuina e Iam i le tauvaga ona o se pese e faatatau i se mafutaga a le fatupese ma lona tamā ma e matuai fetaui lelei ma le mafutaga a Iam ma si ona tamā. 

Na maligi loimata o faamasino ma faatusatusa o latou faalogona i le mafatia o loo iai Iam i le toesea ai o lona tama na faaiu a latou manatu faaalia i le faailoa ai ia Iam Tongi “You’re going to Hollywood”. 

E oo mai le taimi na tuufaatasia ai lenei ripoti ua oo atu i le 3.1miliona le aofaiga o i iatou ua maimoaina le video a Iam Tongi i luga o le You Tube.