O le mafine Samoa ia Faith Fruean sa ia matuā faaaogā faalēalofa le faatuatuaga a ni sui e toalua o lona aiga mai Samoa sa fesoasoani iai e malaga mai i Niu Sila nei mo galuega, i lona faagaoia lea o a la teuga tupe.
O loo lipotia e le lomiga a le NZ Herald, o Fruean, sa ia tatalaina teuga tupe – bank accounts – ma pepa tala tupe faaaitalafu – credit cards – ma nonoga tupe i igoa o nei taulelea, ma ia faaalu ai o la totogi i ana tafaoga i atunuu i fafo ma faatau ai ana mea totino matalasi.
Ae peitai, o lea mafine mai Marton i le itumalo o Whanganui i le motu nei i matu o Niu Sila, sa faasaoina mai le tofu i le falepuipui ina ua lauina lona faasalaga i le vaiaso talu ai, ae faasalaina i le 12 masina e nofo vaavaia ai, i ni moliaga o le lē faamaoni, ina ua mae’a ona ia faotagaina le $130,718.00 mai i nei alii talavou e toalua e aunoa ma lo la iloaina.
Sa faalogologo ai le faamasinoga, o Faith Fruean, sa fesoasoaina i le auina mai o Tautai Solomona e 21 tausaga ma Ransom Fruean e 20 e faigaluega ai i Niu Sila nei.
O Solomona e matamuli toe vaivai le tautala i le gagana Peretania, ma Ransom Fruean o le kasegi a lona toalua ia Ben Fruean, sa fesoasoani iai Faith Fruean e tatala a la teuga tupe e alu iai o la totogi.
O nei teuga tupe sa mafai ona saofia iai Faith Fruean, e ala i numera faalilolilo tala tupe – pin numbers – sa ia faavaeina, faapea ma pepa tala tupe faaaitalafu – credits cards – i igoa o nei taulelea.
Sa mafai e lea tamaitai ona ia faaui atu tupe i lana teuga tupe ma ia talosagaina nonoga tupe i o la igoa, ae o le taimi lava e talia ai nei nonogatupe ma alu ia la teuga tupe, ona toe faaui atu lea e Faith Fruean i lana teuga tupe.
Sa faalogologo ai foi faatonu o le faamasinoga, sa telefoni Ben le toalua o Faith i le faletupe ma faafoliga o ia o Solomona i le toe talosaga mo le toe fia faaopoopo o se seleni e $2000 i le credit card e pei ona mafai ai.
Sa faaalia e le loia a leoleo, sa i’u ane e $86,729.00 le vaega tupe a Solomona sa lusi e ui lava ina ia maua le $1000.00 o lona totogi i le vaiaso.
Sa iloa e Solomona e leai ma sana tupe o iai i le lata i le tolu tausaga ina ua alu ese ma lea ulugalii i le 2018, leai ma sana tupe sa iai mo lana faaipoipoga.
I le faamasinoga faaitumalo i Whanganui sa logo ai e le alii faamasino Judge Justin Marinovich ia Faith Fruean, sa ia faavaleaina ia Solomona ma Fruean ma solia lo la faatuatuaga ia i laua ma lona toalua.
