E silia ma le 130 tagata na omai i le uluai meli ua afea Niu Sila ua faamaonia siaki o le Koviti.
O le Ovation of the Seas e latalata i le 5000 le pasese ma le 1300 o le aufaigaluega, ma o lea na malaga mai Tahiti ma taunuu i Napier, faaauau mai ai ananafi i le taeao i Ueligitone, a uma ona alu lea i Picton ae e lei foi i Sini, Ausetalia.
Ae i faamaoniga mai le pulega a le soifua maloloina, Te Whatu Ora anapo, e toa 129 le pasese ua maua i le Koviti faapea ai le toalua o le aufaigaluega.
Mai lea fuainumera e na o le toatolu tagata aafia fou ua faaopoopo i totonu o le 24 itula.
Ua faamaonia mai ai foi e le soifua maloloina i Hawke’s Bay o lea lava na muai logoina i latou e tusa ma cases faamaonia ma o lea foi na uia uma auala o puipuiga.
Ae mai le pulega a le vaa Royal Caribbean, o cases faamaonia o loo faanofoesea i totonu o o latou potu mo le 5 aso ma a mae’a lea piriota ae o loo maua pea auga ona faaauau ai lea i le aso lona ono ma le fitu.
E ui i lea lipoti o loo mafanafana le minisita o le Koviti a Niu Sila, Ayesha Verrall e le o maualuga le tulaga lamatia o le atunuu ona o loo maualuga le fuainumera o tagata ua uma ona faia tuipuipui o le Koviti.
