A o iai Niu Sila i vaitau mālūlū, ua faailoa mai nei le fetaia’i pea o tagatānuu Kiwi ma faafitauli i tulaga o le eletise.
Faamauina le aafia ai o le faitau afe o tagata ma tulaga o le lē gafatia ona totogiina pili o le eletise, mo le tele o meafai i totonu o le aiga, faapei o le maua ai o se māfanafana e faaaogā ai masini faamāfanafana poo heaters.
I lipoti mai le NZ Herald, na faasoa ai se tinā e suafa ia Liz mai Magele i Sasa’e, i le faigatā ona maua o se māfanafana i tulaga ua iai nei o ia ma lona aiga ona o lona lē mafai ona totogiina pili o le eletise, talu ai le taugatā tele o le tau o pili ua iai nei.
Ma na ia faaalia foi, le lilifa aga’i i nisi o auala e taumafai e togitogi faavaitaimi ai le pili o le eletise, ma nonō mai i nisi o faalapotopotoga poo walfare ona o le lē gafatia o pili.
E pei ona faamatala sa na o le $80 le tau o le pili sa iai i le masina ae o lea ua ova ma le $120 le tau ua iai nei.
Ua fautuaina ai e nisi o faalapotopotoga le tele o kamupanī o loo faaalu atu ai le eletise, e pei o le Mercury ma isi ina ia alolofa ane i nai tagata o loo aafia i tulaga o le taugatā tele o le soifuaga ua iai nei.
I faamaumauga o loo ta’ua ai e silia ma le 100,000 tagata Kiwi o loo aafia i lenei faafitauli, ua fautuaina le moomia ona galulue faatasi o pulega ma kamupani e faatino ni fesoasoani ina ia soa le matāupu, aemaise le maua ai o tali e fesoasoani atu i tagata lautele o loo aafia i lenei faafitauli.
Puna o Faamatalaga: https://www.nzherald.co.nz/business/as-kiwis-battle-rising-electricity-bills-campaigners-call-for-change-power-to-the-people-part-1/LLE2GYWHT5BODH5FAXE6ZQGFDI/?lid=eocqf68are1w
