Ua fa’amaonia e le Matāgaluega o le Soifua Mālōlōina le fa’aopoopo ai oi latou e to’a 485 fou ua a’afia i le fa’amai i totonu o le 24 itula.
Ua si’itia ai nei i le 6,731 i latou ua a’afia i le atunu’u lautele talu mai le pepesi ai i tua o le fa’amai i le mamalu lautele o le atunu’u i le aso 17 o Mati 2022. Mai le 6,731, ua fa’amauina e to’a 6,201 i latou ua a’afia o loo aumau i Upolu, 525 mai i le motu o Savai’i ma le to’a 5 oi latou ua fa’amauina ua a’afia mai Manono Tai.
E leai se maliu fou ona o le KOVITI-19 ua fa’amauina mai i totonu o lenei 24 itula ma o loo tumau pea le aofai o i latou ua maliliu talu ona pepesi i tua le faama’i i le Aso 17 o Mati i le to’a 13.
Ua ripotia mai foi e le Matāgaluega o le Soifua Mālōlōina e to’a 16 i latou o lo’o fa’anofoesea i le Falema’i ma le to’atolu o lo’o i le potu tigaina le ICU mai le 2:00 i le aoauli o le Aso 18 Aperila 2022 i le 2:00 i le aoauli o le Aso 19 Aperila 2022.
Na fa’amanatu ai foi e le Matagaluega le atunu’u, ina ia faia tui puipui o le Koviti – 19 aua lava le tete’e atu i le fa’amai. O le saogalemu ma le malu puipuia o tatou aiga ma ê pele, o le galuega fai fa’atasi lea.
