I faamaumauga a le Faalapotopotoga o le Soifua Maloloina a le Lalolagi ua faamauina ai o le tausaga na tea nei e silia i le 20 miliona le aofai o tagata na maua i le gasegase o le kanesa, ae toa 10 miliona na maliliu ai.

O ituaiga kanesa o loo tele na aafia ma maliliu ai tagata e aofia ai le kanesa o le susu, kanesa o le māmā, kanesa o le ate, kanesa o le taufale (bowel cancer) ma le kanesa o le manava.

Mo Samoa lava ia, e 25 ituaiga kanesa eseese ua iai i totonu o le atunuu ma ua aafia ai nisi o le mamalu o le atunuu.

Ae mai i lena 25, o le kanesa o le susu, kanesa o le porosetate, kanesa o le taufale ma le kanesa o le laualo, lea ua sili ona taatele i Samoa.

I faamaumauga a le Sosaite o le Kanesa i Samoa, mo le masina o Ianuari seia oo mai i le taimi lenei e toa 15 nisi tagata fou ua aafia i lea gasegase.

Ae o le tausaga na tea nei e toa 32 i latou ua faamauina ua aafia i le gasegase, ae e iai le talitonuga o le Sosaiete e toatele isi e lei oo atu i totonu o loo aafia.

I faamaumauga o i latou ua aafia ua i se tulaga ogaoga, ma ua lē toe aogā iai se togafitiga, peitai o loo faatino lava galuega fesoasoani a le sosaiete.

O loo agai pea i luga le aofai o tagata o le atunuu ua maua i le kanesa, e ui i le tele o faalauiloa a le Sosaiete.

I faamaumauga a le sosaiete o le tagaga pito i laititi lava ua aafia i le gasegase ma ua fā nei tausaga talu ona aafia ma o loo tausia foi e le Sosaiete i lona aiga, o le pepe tolu tausaga. 

E 6 masina le matua o se pepe na uma lona ola i le tausaga e 2019 i le gasegase o le kanesa.

O le fautuaga lava a le sosaiete, ia vave ona iloa, vave siaki se fomai ma vave fai ai ni togafitiga ina ia faasaoina mai ai se soifua.