Fai mai le iuga o se suesuega sa faia talu ai nei, o tamaiti e nonofo i faaitu i tua atu o aai aupito tetele e fā o Ausetalia, e faaluaina avanoa e maua ai i le asthma poo le ma’i sela nai lo tamaiti o loo nonofo i totonu o le aai.
O faamatalaga mai le tusigaigoa o le 2021 ua fesoasoani i le faaiuga o lenei suesuega sa fesiligia ai tagata Ausetalia ia faasoa ane faamatalaga e faatatau i o latou soifua maloloina.
O le team la mai le Telethon Kids ma le Curtin University sa tuufaatasia nei faamatalaga ma iloa ai le tulaga e pei ona faailoa.
O aai aupito tetele o Ausetalia e aofia ai Sini, Melepone, Brisbane ma Perth ma ua faate’ia ai foi nisi o le ausuesue ona sa iai le manatu o aai tutotonu e tele ai taavale ma lē mamā le ea peitai ua iloa i le suesuega o loo sili ona aafia tamaiti e aumau i nofoaga i tua mai o ia aai.
O Ausetalia le isi atunuu aupito maualuga le aofai o tagata e aafia i le asthma aemaise foi i tamaiti e tasi le tausaga agai i le 14 tausaga le matutua.
