O le tofiga a le Palemia ua filifilia ai le sui faipule o Faleata 4 e avea ma se tasi o Minisita o le Kapeneta na te fa’aauau le tofi Minisita o le Matagaluega o Punaoa Faalenatura ma Siosiomaga, ua faailoa ai e le tōfā i le igoamatua, le fetalaiga Ale Vena Ale, o ‘ele’ele ua faatau e nisi o nu’u ma afio’aga i le aiaiga e umia faaleaganu’u ae e le o mafai ona resitala, o le tasi o ana galuega muamua o le a faatino.
O nuu mavae e pei o le foaiala o Vaitele, ma afio’aga o le itumalo o le Minisita filifilia o loo feagai ma faafitauli i le lē mafai ona resitala fasi fanua ua mae’a ona totogi i aiaiga e umia faaleaganu’u.
O le filifilia o le sui faipule o Faleata 4 ua ave ai le faafetai a le tōfā Ale Vena Ale i le Palemia i le amana’ia o lona tagata aemaise o lona itumalo faapalota.
Le tōfā Ale Vena Ale o le Minisita filifilia fou mo le Matagaluega o Punaoa Faalenatura ma Siosiomaga.
Sa avea ma Minisita Lagolago o le Matagaluega o le Soifua Maloloina i le amataga o le paeaiga 18 a le Palemene i le mae’a o le palota tele faafuasei a le atunuu ia Aukuso o le tausaga nei.
O le afioga Seve Te’i Fuimaono sa avea ma Minisita o le Matagaluega o Punaoa Faalenatura ma Siosiomaga peita’i ua soloia lona tofi faipule ina ua faamaonia moliaga o faiga faaālatua i le tagi tau palota mai Safata 1 ua mae’a su’esu’eina e le faamasinoga i le masina na tea nei.
