Silasila le faalapotopotoga a le S.P.R.E.P. ma le S.P.C. e toe faafou le la maliega auā le galulue faatasi i polokalame mo le malupuipuia o le siosiomaga i le Pasefika

September 15, 2023
Samoa
Tusia: Seia Ualesi

O le tausaga 2017 na sainia ai le maliega i le faalapotopotoga o polokalame faalesiosiomaga i le Pasefika poo le Secretariat of the Pacific Regional Environmental Programme (S.P.R.E.P.) ma le faalapotopotoga ua ta’ua o le Pacific Community (S.P.C.) e vaavaalua ai i tiute ma matafaioi auā le manuia lautele o le Pasefika ma ona tagata aemaise nisi o mataupu tau le siosiomaga.

O le toe matimati ai o le toe faafouina o lenei maliega na faailoa lea e le Faatonu o le S.P.C. Dr Stuart Minchin i le fonotaga na faatautaia i Samoa nei i lenei vaiaso ma faailo ai le faigapaaga a faalapotopotoga nei i vaega tau saienisi ina ia unaia pea sailiga fofo mai mataupu o loo aafia ai le Pasefika.

“O faalapotopotoga nei ua autausaga foi le la talaaga i le galulue faatasi o le S.P.C. ua 75 tausaga talu ona faavaeina e faapea foi i le S.P.R.E.P. lea ua faamanatu lona 30 tausaga ma o na tausaga e tele sa faifaimea faatasi ai e folasia nisi o faafitauli o loo feagai ma le Pasefika.”

I le auaunaga a le S.P.C. e pei ona tautua ai i le Pasefika na faailoa ai nisi o vaega o loo ave ai le auaunaga e ala i le faatinoina o polokalame o loo silasila toto’a ai i mataupu i avanoa tutusa, ogasami, o le itu i taumafa ma suiga o le tau.

O loo iai foi le moomia faanatinati e siitia ai le tulaga o le seleni o loo faamatuu mo suiga o le tau ma ana polokalame ma o nei vaega uma ina ia utagia e le Pasefika le tulaga e ao ina nofouta ai.

“E tatau ona o tatou galulue faatasi e fofo faafitauli ma mataupu o loo aafia ai mai suiga o le tau.

“Ma e ao ina auai uma finagalo o tagata o le Pasefika e tetee atu ma saili fofo mo nei faafitauli.”

Mo mataupu lava ia i polokalame tau suiga ole tau na momoli ai le faamalo a Minchin ile auaunaga ale S.P.R.E.P lea oloo tele lona sao ilenei tulaga ma faailoa ai le fia auai o le S.P.C. e tautua faatasi ina ia mautinoa o loo ua faamalieina manaoga o tatou tagata ae le gata i lea o le saogalemu mai suiga eseese o le tau ua vaaia nei.

O loo iai le fuafuaga o le masina o Oketopa lea e faia ai le fono faaletausaga a le S.P.C. ma faatino ai le faafouina o lenei faigapaaga i Noumea New Caledonia.