Ua lima tausaga talu ona tuua Samoa ae siitia atu i Niu Sila le afioga Leaupepe Jnr Talai ma lona aiga ona o galuega. O lona iai i lena atunuu sa ia aoao mai ai manaoga o le mamalu o Samoa o alala i fafo, ma faavae ai se tautua ua mafai ai ona totogi iai seleni a nisi o le atunuu i fafo, ae tala e aiga i Samoa e ala i oloa o loo latou manaomia.
Ua faaigoaina lea auaunaga o le Talofa Voucher lea na faaalia e Leaupepe i se feiloaiga ma tusitala, ua mafai ona fesoasoani lea tautua i aiga i fafo pe a mananao e fausia se maota ma se laoa, ona e tala oloa uma i Samoa le seleni mo le galuega i kamupani o loo maua ai oloa faufale.
O se fesoasoani ua talitonuina ai e aiga i fafo e pei ona faaalia e Leaupepe aua ua alu tonu ai le seleni i le faagaioia o se galuega faapea e aunoa ma le lafo o le tupe ae alu atu ese isi fuafuaga e ave iai, ona le mae’a lea o le galuega o le fale.
Le afioga Leaupepe Jnr Talai o le sui o le Talofa Voucher i Niu Sila, o loo i Samoa ona o nisi o fuafuaga faaleaiga ma le tapenaina o le koneseti tele a le Punialavaa e faia i le faaiuga o lenei vaiaso.
