O lipoti ua tauaao e le faletupe tutotonu o Samoa mai pisinisi ma auaunaga tau tupe tuma’oti i Samoa ua faailoa ai le siitia maualuga o gaioiga taufaavalea ma taufaasesē e faaaogā ai tupe ae ua faaaogā ai auala o fesoota’iga televavave faaonaponei.
O le mae’a o le tausaga faaletupe 2024 i le 2025 o le 70 pasene o ia gaioiga taufaasesē ma taufaavalea sa aafia ai faletupe ma pisinisi tau tupe poo financial institutions.
O le tausaga faaletupe o loo faagasolo nei e 60 pasene aafiaga lava o ia auaunaga tau pisinisi ma o loo faailoa ia tulaga i lipoti ua taulimaina e le faletupe tutotonu o Samoa le Central Bank of Samoa.
Ua aumai ai i se tulaga faalaua’itele se faasalalauga mai lea faletupe o le malo ua lapata’ia malosi ai o tatou tagata ma pisinisi ina ia mataala ma mata’alia i gaioiga i luga o fesoota’iga tau i upega tafa’ilagi o loo faaailoa ai ia faiga solitulafono.
O nisi o ia gaioiga ua gaugau ai nisi ia latou tupe ua lafo i le faalapotopotoga poo le tagata i fafo o loo taulamua i ia faiga taufaavalea ma taufaasesē.
O se lapata’iga tāua lea mai le faletupe tutotonu a o aga atu le atunuu aemaise o pisinisi i le faai’uga o le tausaga e saoasaoa ai le faaaogāina o seleni mo aso fiafia o le Kilisimasi ma le Tausaga Fou.
