Ua faailoa e le kamupani inisiua a le Tower o le a sii i luga o le totogi o ana premiums, totogi o inisiua mo i latou o loo aumau i nofoaga e lamatia i lologa ma nofoaga e lamatia i sologaeleele.
Ua faailoa e le kamupani i le lipoti a le televise tasi ua faia lea gaioiga i le tulai mai o suiga i le tau ma lamatiaga i le siosiomaga aemaise le vaegatupe e 5.1 miliona sa lusi i le taimi o le afā o Gabrielle ma lologa i Aukilani.
Peitai o le faailoa mai foi o lea tulaga o lona uiga o le a omia i le ogatotonu paaga poo i latou e iai inisiua aemaise pe afai e tau fai siitia uma totogi a kamupani inisiua.
E manatu le toatele e le taumate o le a tau fai siitia uma totogi o inisiua i isi foi kamupani ae faailoa foi e nisi e le taumate o le a faatali teisi isi kamupani seia toe amata lelei le isi tausaga faaletupe faatoa faailoa mai foi a latou siitaga.
O se faamatalaga mai le ofisa le Consumer NZ ua ta’ua ai o le a tele foi se aafiaga o nei siitaga i le tagata faatau poo paaga a kamupani inisiua, ma o le a faaopoopo atu i mafatiaga ma luitau o feagai ma le toatele i lenei vaitau.
