E lē tau faailo se tasi o alii taalo i le atunuu, Darren Young 53 tausaga na manumalo i le malafoni faavaomalo a Amerika Samoa lea na faia i le vaiaso ua mavae.
O Young na tauva e aofia ai ma nisi o sui e 30 mai atunuu e 8 ma o se tauvaga muamua lea ua faia i laufanua o Amerika Samoa.
Na amata mai lenei tuuga i le Veteran Stadium i Tafuna seia oo i le tini i se paka i Fagaalu ma o le taimi a lenei alii e 4 itula ma le 5minute.
O Young e ui i le matua o lona soifua ae o loo maua pea lona malosi e tauaveina ai le tagavai a le atunuu e pei o taaloga a le Pasefika i le tele o tausaga ma isi taaloga faavaomalo.
“O se tuuga faigata tele na faalogoina le tiga o vae, ua 53 o’u tausaga ae faafetai o lea lava e mafai ona ou tamoe mo le 42 kilomita.
“O le paleni e o lua ma le consistence ma le lagolago a si o’u aiga lea ou te mafaia ai ona ou faataunuu soo se tuuga lava ou te tauva ai.
“Faafetai ai foi ua maua ai le avanoa e tauva ai ma nisi o sui iinei i Amerika Samoa e ala i lenei faamoemoe.”
O loo tapena pea Young mo se tasi o tauvaga faavaomalo poo le World Ironman Champs i Kona i Hawaii mo le tausaga fou ma o se tasi foi ua filifilia i le ‘au Triathlon a Samoa mo taaloga a le Pasefika i se masina o i luma.
