Ua faailoa e le pulega a le auaunaga o le Instagram i ana paaga o loo silasila nei i se mataupu lea o loo feta’ua’ina ai le logoina o tagata e faapea ua faamalolo lē tumau a latou accounts mai lea auaunaga.
Faailoa mai e le pulega o loo galulue ai i le taimi nei ae foliga e fai si toatele o tagata o loo aafia ai ma ua loka a latou accounts.
O nisi o tagata e faaaogaina le instagram ua lipotia lo latou vaaia o ni faaaliga e faapea ua loka a latou accounts ae o loo mafai lava ona o latou vaai ma faaaoga foi.
O nisi ua lipotia ua matuai le mafai lava ona faaaoga lea auaunaga a o nisi ua ta’ua ua toaititi a latou followers poo i latou o loo mulimulitai ia latou accounts.
Na amata aliae mai lea faaletonu poo le ‘afa o le 11 i le po anapo.
Ua faailoa foi lipoti e foliga e eseese uma aafiaga o accounts a tagata i le faaletonu lea ma o loo talia nei se isi lipoti lata mai mai le pulega a lea foi upega tafailagi.
