O tomai aoaoina o tina maupaolo o loo auai i le polokalame o le Nofotane a le Toomaga mo ē Puapuagatia, ua faailoa e lea faalapotopotoga tuma’oti le aofia o le toaselau o ia tina faipisinisi i se aoaoga ua taulamua ai e le auaunaga a Malo aufaatasi ua ta’ua o le ESCAP ae faatupe e le vaega ua faaigoaina o le Global Affairs Canada.

O se aoaoga ua saga faaleleia ai le silafia o ia tina i le faagaioia o pisinisi, ma malamalama ai foi i itu e sili ona taua i le faagaioia o se pisinisi.

E toaono tina o le a tauia i le 500 tala Amerika e fua i le tulaga alualu i luma o lana pisinisi e pei ona faailoa e le Toomaga i se pepa o faamatalaga faalauaitele.

O Novema o le tausaga na tea nei na amata ai lenei fesoasoani ma le faamoemoe maualuga ia avea o se isi faitotoa e ulufale ai tina nofotane faipisinisi i se isi laasaga lelei mo le faaauauina pea o a latou taumafaiga o loo fesoasoani ai i le tausaga o o latou aiga.