O se popolega le toatele o leoleo Niu Sila ua agai e galulue i Ausetalia, e ui e lē o iloa e le matagaluega o leoleo pe fia sa’o le aofai.

O faamaumauga mai le matagaluega o leoleo i Ausetalia, e 77 leoleo Niu Sila lea ua o atu e galulue i Kuiniselani, ae latalata i le 20 e o i le Northern Territory talu mai faalauiloa na sau i tua i le masina o Aokuso.

Fai mai ai le peresetene o le asosi o leoleo i Niu Sila, Chris Cahill, o se popolega tele ma e iai le avanoa e ono faaopoopo ai pea le fuainumera o leoleo Kiwi e agai atu i Ausetalia, ona o le taugata tele o le soifuaga iinei pe a faatusatusa i totogi.

E molimau Cahill o le toatele o leoleo o lea ua tai lua galuega ona ua lē gafatia e totogi mai galuega le tele o peimeni.

O leoleo Constables i Ausetalia o lea o loo totogi amata i le silia ma le $100,000 i le tausaga, ae o le leoleo ua 10 tausaga o galue e ono amata mai le $118,000 le totogi amata e ese ai le $20,000 o loo ofo mai e fesoasoani e tapena atu ai.

O loo lipotia ai le maofa o leoleo Niu Sila ina ua fofola mai ofo ma penefiti e maua e leoleo o loo o atu i le Northern Territory.

Ua faaleo mai ai e le peresetene ia Cahill, o le isi manaoga tele o loo iai nei i leoleo Niu Sila, o le fia maua o totogi o ovataimi.

O loo faaauau pea asiasiga a le sui o le ofisa o leoleo mai Northern Territory o loo malaga mai i Aukilani auā le faia o faatalanoaga.Ae i ofo a leoleo Kuiniselani, e tai tutusa lava.