Fai mai le palemia o Ausetalia, Scott Morrison o le faalavelave o loo tulai mai I Ukraine ose fafagu lea mo Eulopa aemaise o seisi ituaiga faiga fou ua vaaia nei ua faamatau ai le nofo lelei o le lalolagi.
Fai mai le palemia o tulafono sa faaautu iai le nofo lelei o atunuu faavaomalo ma sa lagolagoina le nofo filemu ma le mautu mo tausaga e tele, ua oia nei. Lipotia e le 7News ole saunoaga a le palemia ua saunia mo se tautalaga I le Lowy Institute Forum e faia ile aso ma ole a taua ai foi I lana saunoaga o loo feagai nei Ausetalia ma se tulaga lamatia o le siosiomaga I tulaga tau le puipuiga talu ai le taua lona lua o le lalolagi.
Faia lea saunoaga ae ua lipotia mai le taunuu o auupega o missiles a Ausetalia I totonu o Ukraine, ose vaega lea o le fesoasoani a le faigamalo a le feterale mo lea atunuu pei ona folafola ai le 70 miliona e fesoasoani ai,
O le talanoaga a le peresetene o Ukraine, Volodymyr Zelenski ma Morrison na faia ile telefoni ile faaiuga o le vaiaso ua momoli mai ai le faafetai a le alii peresetene ia Ausetalia ma le fesoasoani ua tuuina atu. Faaopoopo atu I lea ua oo atu ile 1700 talosaga o visa ua faatagaina e Ausetalia mo tagata Ukraine e malaga mai ai I ausetalia nei.
