O le alii taalo lauiloa o Sir Michael Jones ma le isi foi alii tautaua i le lakapi o Eroni Clarke, o laua ia na faia ni a la saunoaga e lagolago ai Joshua Tofa Tulisi, 26 tausaga i le faamasinoga maualuga i Aukilani i le asō. O le alii o Tulisi ua ia ioeina ona moliaga o le umia ma le sapalaia o fualaau o le MDMA. 

O lipotia a le Stuff ua ta’ua ai nei faamatalaga e faapea ua lauina faatasi le iuga o le alii o Tulisi ma isi e pei o Taniela Mafileo, Siolei Fakafanua ma Jarred Singe ma le isi o loo taofia le faailoaina o le igoa, i latou ia sa faia iai suesuega a leoleo talu mai le 2020.

O le faamatalaga a Jones e pei ona ta’ua i le lipoti na ia faailoa ai e ui e na te le lagolagoina gaioiga sa faia e Tulisi, ae na te iloa sa unaia foi lea alii ona o nisi o luitau sa feagai ma ia a o tuputupu ae i West Auckland o se tama Polenisia.

Ua faailoa foi i lea lava lipoti se faamatalaga mai ia Eroni Clarke e iai lona sootaga faaleaiga ia Tofa Tulisi, o le o loo aofia i le mataupu o se tagata sa malaga i Ausetalia e tausi nai ona grandparents ma e ui na te le lagolagoina foi mataupu ua aafia ai Tulisi ae na te iloa ua ia aoaoina ai se lesona mai le tulaga sa tulai mai.

E le o faailoa mai i le lipoti se faaiuga ua tuuina i lē o loo aafia sei vagana isi na molia faatasi i latou.