Ua nofo sauni le toatele mo le taaloga aupito tāua mo le Toa Samoa i le latou finau ai i le Ipu o le lalolagi i le Lakapi liki i lenei tausaga ma e le gata ia Samoa ae faapea foi i le atunuu o loo talimalo i le faamoemoe, o Egelani lea o le a toe fetaui ma le Toa i le taaloga o le semifinals i le po a taeao poo le taeao o le Aso Sa o muamua.
O lipoti i le aso ananafi i luga o upega tafailagi ua agiga ai se faamatalaga mai le faiaoga o le ‘au a Egelani o Shaun Wane e faapea o lana ‘au o underdogs ia ia Samoa pe a fua i le toatele o tama taaalo a Samoa na auai i le sailiga siamupini o le NRL.
O le semifinals muamua o le a fetaui ai Ausetalia ma Niu Sila i Leeds ma le semi lona lua o Egelani ma Samoa e faia i Lonetona.
O le ‘au a Samoa: Faamanu Brown, Stephen Crichton, Chanel Harris-Tavita, Royce Hunt, Oregon Kaufusi, Tim Lafai, Spencer Leniu, Jarome Luai, Taylan May, Anthony Milford, Josh Papali’i, Junior Paulo (Kapeteni), Ligi Sao, Ken Sio, Jaydn Su’a, Joseph Suaali’i, Martin Taupau, Brian To’o ma Kelma Tuilagi.
Talosia ia le alofaiva o tamafanau a Samoa ma ia manuia foi lau tapuaiga.
