Ua faitau aso ai nei taunuu i le Kelisimasi o lenei tausaga 2024, ma ua faailoa ai e le faalapotopotoga tuma’oti o le Toomaga mo ē Puapuagatia o se taimi tāua lenei e maua ai le mafutaga fiafia ma aiga aemaise mātua ma fanau, peitai e iai lava faafitauli e tutupu ma aliali mai ai.
Ua faailoa ai e le Toomaga lana laina telefoni o fesoota’iga mo ni faafitauli e aafia ai le sologa lelei o aso fiafia.
O se laina telefoni e mafai ona valaau atu ai le atunuu ma faatalatalanoa ni faafitauli e fesoua’ina ai le taimi o loo feagai ma mālōlōga o tafaoga ma aso fiafia o le faamanatuina o le aso soifua o le pepe o le Kelisimasi.
Ua faaaogā ai foi lea avanoa e momoli ai le faafetai a lea faalapotopotoga i le atunuu i le lagolago atu i le latou galuega, aemaise lava o fesoasoani o loo tuuina atu, e lē gata o tupe ae o taumafa ma isi vaega o loo mana’omia i le galuega a le Toomaga mo ē Puapuagatia.
