O le aso 5 o Fepuari o le tausaga fou 2025 o le a lau ai se faasalaga a le faamasinoga mo le tamaitai Filipino o Arrianne Fae Timblique, ua suia lana tetee i lona ioeina o moliaga e lua, o le faaulufale faasolitulafono i Samoa o le nakoti o le ‘aisa, ma lona umia o ni ututau o se laau malosi ina ua ia afea lo tatou atunuu i se malaga mai Pago Pago i le faamoemoe e pu’e le isi vaalele e malaga atu ai i lona atunuu o Filipaina.
Na sauni o le a malaga ese ma Samoa ae o le taimi na siaki ai ana ato i le vaega o le puipuiga na maua ai i lana ato ututau ma ni taga pepa iila laiti sa fafao ai le ‘aisa e tusa le mamafa ma le 0.83 kalama.
O le valaauina o moliaga o Arrianne mo le tuuina atu o molimau a leoleo, ae faailoa ai e lana loia ua mana’o le tamaitai e ioe i moliaga.
Na faatulaga ai loa le Aso Gafua o le vaiaso nei e lau ai se faasalaga peitai e iai vaega e le’i mae’a ona tapena e lana loia mo le folasaga faai’u e fua iai se faasalaga, o le mafuaaga lea o le toe tolo atu o le lauina o le faasalaga i le masina o Fepuari o le tausaga fou.
O loo faaauau ona nofo o ia i Samoa i ni aiaiga a o tatala i tua e faatali le aso e lau ai sona faasalaga.
