Ua sauni le afioga i le Sui Fofoga Fetalai le tofa Auapa’au Mulipola Aloitafua, e tali i le finagalo tetee o le faipule o Faasalelega Numera 5 le afioga Peseta Vaifou Tevaga sa tuusa’o ai le saunoaga a Peseta i le Palemene i le lē tatau ona avea le sui faipule o Aiga i le Tai ma ta’ita’ifono o le komiti su’esu’e a le Palemene sa faia sailiiliga i faaletonu i le eseese o lomiga o le tulafono fou o faamasinoga o fanua ma suafa ma le tulafono teuteu o le Faavae.
E lē ese mafuaaga o le finagalo o le faipule o Faasaleleaga Numera 5 ma mafuaaga na tusi ai le ta’ita’i o le Itu agai i le Fofoga Fetalai i lona teena foi o le avea o le Sui Fofoga Fetalai ma ta’ita’ifono ona sa tetee i le tulafono i lana molimau sa faia i luma o le komiti a le paeaiga 16 a le Palemene sa iloiloina ia tulafono a o le’i tuuina atu i le Palemene mo le pasiaina.
Se vaega i felafolafoa’iga i le lipoti a le komiti su’esu’e faapitoa a le Palemene e ana le lipoti ua fautuaina ai le faasolomuli ma lafoai le tulafono teuteu o le faavae ma le tulafono fou o fanua ma suafa. O loo faaauau pea i le faaiuga o lenei vaiaso ona talanoaina le lipoti a le komiti su’esu’e faapitoa.
