O le masina lenei o Me e usuia ai le fonotele i Malua a le Ekalesia Faapotopotoga Kerisiano Samoa, ma o lenei foi masina o le a faamanatu ai ma le aso fanau o se tasi o Kolisi maualuga a le Ekalesia, le Kolisi o Leulumoega Fou ua atoa le 135 tausaga talu ona faatūina.
O se Kolisi sa avea ma a’oga maualuga poo se high school ina ua ulua’i faatūina i Ma’auga ma Nu’uausala i le tausaga e 1890.
E 35 tausaga o faagaioia ai mai i lea nofoaga le a’oga, se’ia oo ina siitia mai i le lotoā a le Ekalesia i Malua e pei ona iai nei, lea ua faailoa mai e le pule o le kolisi ua selau tausaga talu ona faagaioia le Kolisi o Leulumoega Fou i le aai tele o le ekalesia EFKS i Malua.
E iai le talitonuga o se tasi lea o a’oga pito matua i totonu o Samoa pe a fua i le tausaga e 1830 na taunuu ai le lotu LMS i le atunuu ae o le 60 tausaga talu ona mautū le lotu ae amata le a’oga maualuga a Leulumoega fou.
Le pule o le Kolisi o Leulumoega Fou le susuga Lupeomanu Tumanuvao Lolesio Viane.
O le Aso Lulu o le vaiaso nei e faamanatu ai le 135 tausaga o le Kolisi o Leulumoega Fou ma o le afioga i le Ao o le Malo o loo valaau faaaloalo iai le Kolisi, ae o le Minisita o A’oga ma Aganuu o le saunoaga aami lea o le sauniga o le atoaga o le 135 tausaga o le kolisi.
