Fai mai e oo atu le maualalo i le $49 le pasese e mafai ona faimalaga ai i le kamupani vaalele fou a Ausetalia ua faailoa mai i le asō ua lata nei ona faalauiloa aloaia. 

O le kamupani vaalele o le Bonza ua faailoa i le asō o le a mafai ona faatonu ai pe book ai avanoa o tagata e malaga ai i nofoaga poo destinations e 15 e oo iai le latou auaunaga.

O le aso 31 o Ianuari lona uiga o le Aso Lua o le vaiaso fou le uluai malaga a le kamupani vaalele lea mai le Sunshine Coast agai i le Whitsunday.

Fai mai le sui o le kamupani ua oo i le taimi ua tatau ai ona asia e tagata Ausetalia o latou lava vaifanua ma o le 96 pasene o vaega o le a agai iai le latou auaunaga, e le o oo iai auaunaga a isi kamupani vaalele ua leva ona iai.

O pasese aupito taugofie i totonu lava ia o Ausetalia e $49 tala e agai ai i nofoaga e pei le Sunshine Coast agai i Rockhampton, Port Macquarie ma Coffs Harbour.

Fai mai o le tau aupito taugata a le Bonza o loo iai i le taimi nei e $79 tala i le agai lea i nofoaga e pei o Mildura ma Avalon.

O faigamalaga o loo mafai ona book atu e oo ia Oketopa ma o loo iai foi le latou app e mafai ona faaaogaina.