E le’i lelei ona teumalu e le Engage Safety vailaau o tui ma aafia ai le to’atele. 
O le Engage Safety na konekarate ai i lalo o le Southern District Health Board latou te momoliina vailaau i Central Otago ma Queenstown Lake i le tausaga talu ai. 

Peitai e le’i lelei ona teu le vailaau ma ua fesiligia nei le puipuia atoatoa o le 1,576 tagata na faia ai o latou tui. 
O le faai’uga lea o le su’esu’ega tuto’atasi na toe faailoa mai ananafi e lē gata o le lē lelei ona faatautai o galuega a le Engage Safety, teu vailaau i le pusaaisa a le faatonusili o loo i lona fale ma leai ni faamaumauga e iloa ai le fesuisuiga o le mālūlū. 

Mai le silia ma le 1,500 o tagata na aafia ai e oo mai i le taimi e tuufaatasia ai tala e le’i maua lava e le matagaluega le 112 o i latou. 

E lē o iai se popolega i le saogalemu o le vailaau peitai o le fesili tele poo aogā pea le vailaau. 

Mai le su’esu’ega ua maua ai foi na expire pe na uma le aogā o le CCA poo le cold chain accreditation a le Engage Safety ia Novema o le 2021. 

Tala a le leitio a Niu Sila, e le’i silafia e le faatonusili le faaletonu o a latou auaunaga. 
Ua talia e le Southern DHB le lipoti ma ua vaavaai foi i fautuaga ua tuuina mai ai.