E manino ma toe tuusa’o faamatalaga a le minisita o le va i fafo a Niu Sila, Nanaia Mahuta e le auai Niu Sila i le AUKUS.
O le AUKUS o le maliega lenei ua iai faatasi Ausetalia, Peretania ma Amerika ma o se osiga feagaiga o le a faataga ai vaa maulu faaniukilia e leoina e le gata o atunuu nei e tolu ae faapea le Pasefika.
O se faiga ia taumafai e faasesegi ai Saina a o taumafai mai ma lona malosi e faaofi mai lana militeli i le Pasefika.
O se mataupu na talanoaina a o iai le failautusi o le malo tele Antony Blinken i Niu Sila nei e le gata o feiloaiga ma le minisita o le va i fafo a Niu Sila faapea le auai mai e lagolago le ‘au a tamaitai mai Amerika o loo tausinio i taaloga a le FIFA.
A o fai mai ai le failautusi o loo tatala pea le faitotoa mo Niu Sila e ofi atu ai i le AUKUS, na toe tapuni lava e le minisita ia Mahuta lea faitotoa ina ua toe saunoa mulimuli ane e lē o iai se fuafuaga a Niu Sila e fia avea ma sui o le AUKUS ona e le gata e feteenai ma tulafono o loo faasā ai faiga faaniukilia a Niu Sila ae faapea ai faiga faavae a le Pasefika.
