Na maitauina i ata pu’e i luga o upega tafa’ilagi ma faasalalauga a le NZ Herald o loo faaalia ai le sasao ane o le afi i se tasi o loli la’u pusaoloa (truck cab) ua matua’i faaleagaina ai o lea loli tele.
Faamauina na tula’i lea faalavelave i le faaitu e lata ane lava i le uafu a Aukilani i le po anapo.
Lipotia na valaau ane le auaunaga o le tineimu ma faalavelave faafuase’i i le Solent St ma le Tāmaki Drive poo le ‘afa o le sefulu i le afiafi o le Aso Tofi o lenei vaiaso.
Ua māua e taunuu atu vaega o le tineimū ma faalavelave faafuase’i, ua matua’i sasao lava ma faatama’ia lea loli la’u pusaoloa, ma ua vaaia le tetele o le asu uliuli ua amata ona lilo ai lea faaitu, i lalo ifo lava o se auala simā (overpass bridge).
Ua lipotia mai e le vaega tineimū (fire crews) le taumafai e tapē le afi, ma e faapea pe ā ma le itula ma le ‘afa o taumafai atu sui o le tineimū na fesoasoani e tineia lenei mū.
E le’i iai nisi na manunu’a mai lea faalavelave, ma ua faamaonia e le Ofisa o le Uafu (Port of Auckland) o loo saogalemū le avetaavale o lea loli.
Ua faafetaia e le ofisa o uafu le auaunaga a le tineimū ma faalavelave faafuase’i i le latou galuega fitā, aemaise o le vave tali atu i le mū, ua taofia ai le afi mai le sasao tele atu ma faaleaga ai nisi vaega o le uafu.
Puna o Faamatalaga: https://www.nzherald.co.nz/nz/auckland/truck-cab-engulfed-in-flames-near-port-of-auckland-no-injuries-reported/DW5PJMUAXFCKHEG5UFSJOIKB7E
