O vaega faaa’upegaina a Isaraelu ua o latou faamalosia le tapunia o a’oga e tolu e faagaioia e le ofisa o Malo Aufaatasi mo tagata sulufa’i a Palesitina i le itu i Sasae o Ierusalema lea ua maua e Isaraelu.

E faitau selau tamaiti a’oga Palesitina na toe faafoi i o latou aiga mai a’oga ia ina ua aga’i atu iai i le vaiaso nei.

Ua saunoa ai le sui mai le ofisa lea o Malo Aufaatasi, Gen Philippe Lazzarini ua taofia e le faigamalo a Isaraelu le avanoa ma le aiātatau a fanau nei e a’oa’oina ai ma ua o latou tuua’ia foi Isaraelu i le lē amana’ia o tulafono faavaomalo.

O le mau lava a Isaraelu o le ofisa lea o loo tumu i sui o le Hamas e ui o loo tetee pea iai le ofisa lea i ia faamatalaga.

Fai mai e silia ma le 550 tamaiti a’oga mai le 6-15 tausaga na molimauina le aveesea mai o se tasi o tagata faigaluega i a’oga ia ma o se tulaga lē manuia i le vaai a le fanau.

Fai mai le Pulega a Palesitina o nei gaioiga a Isaraelu ua oia ai aiātatau a le fanau faatatau i a’oa’oga.

Puna o Faamatalaga: https://www.bbc.com/news/articles/cqxej00w3wno