O se osofa’iga a Isaraelu i le ‘ea na lūlūina ai se vaega i le itu i Saute o Beirut ae le’i leva lava ona folafola ane e le militeli le tatau ona aga’i ese mai o tagata mai le laumua lea o Lepanona.
O ata mai le upega tafa’ilagi a le Reuters ua iloa atu ai se afi tele o loo sasao ane mai se nofoaga na osofa’ia ma ua faailoa sa taula’i lea osofa’iga i se nofoaga a le Hezbollah i Beirut lea e teu ai ana a’upega o missiles.
E lē o iai se tali a le Hezbollah i le taimi nei e tusa o ia faamatalaga ae ua faailoa e le vaega o le puipuiga a Lepanona ua mae’a ona tapē le afi na afua mai i osofa’iga nei a Isaraelu ma e le’i iai nisi na manunu’a ai.
Ua faailoa le lē fiafia o le Peresetene o Lepanona, Joseph Aoun ia Isaraelu ma ia osofa’iga ma ua una’ia ai Amerika ma Farani ina ia fautua ane ia Isaraelu e taofia loa ia osofa’iga.
O loo faatalia se tali ane a Isaraelu i le mataupu lea ae o loo lipotia le popolega o le to’atele e foliga o le a toe amata ane foi se isi fetauiga i le va lea ae o loo tau fofō atu isi faafitauli i totonu o Gaza ma isi nofoaga i Sasae Tutotonu.
Puna o Faamatalaga: https://edition.cnn.com/2025/04/27/middleeast/beirut-lebanon-strike-israel-latam-intl/index.html
