A’o taoto ai pea i le faamasinoga le tagi tau palota a Falealili 1 lea ua teena le ‘ave i tua, o le Aso Lulu le ogatotonu o lenei vaiaso o le a tulai i luma o le faamasinoga o palota molimau e toalua a le itu tagi.
Ua faailoa i se minute tusitusia mai le faamasinoga e afua mai i folasaga a loia sa fofogaina i le Aso Tofi ua mavae, o le lē oo atu o le 54 molimau mo le itu tagi ma le itu sa faasaga iai le tagi tau palota, ae nao le toatasi le molimau a le itu tagi na oo atu, ua samania ai molimau e toalua mo le itu na faauluina moliaga o faiga faaālatua ina ia oo atu e faia a la molimau.
O lea finagalo o le faamasinoga e mafua mai i le oo atu o le molimau e toatasi ae e lei fesiligia e loia a le itu o loo tuuaia.
E le’i finagalo foi le itu o loo molia e valaau a latou molimau ina ua lē oo atu le toatele o molimau a le itu tagi. I lea tulaga na tulai mai e le’i talosagaina ai foi e loia a le itu tagi ma le itu o loo molia le tuuina atu o ni tusi saisai e sailia ma taofia ai molimau. Ua faailoa e le faamasinoga i lana minute na tuuina mai faaluaitele ua faamautu le mauaina e molimau e toalua a le itu tagi o tusi samania e tatau ai ona oo atu i le faamasinoga.
O i la’ua ia o Malili Nofo Vaega ma Faamotuletia Seu, o molimau ia e toalua o loo lagolagoina a la faamatalaga faatauto tusitusia e le molimau o Leapagatele Alema lea na oo atu i le faamasinoga i le Aso Tofi na tea nei. Ua sauni le faamasinoga e poloaina se tusi saisai e taofia atu ai Malili ma Faamotuletia pe a le oo atu i le faamasinoga.
