O se tasi lenei o vaega o loo tuuina ai le fesoasoani a le Matagaluega o Tina ma Tamaitai Atinae o Afioaga ma Aga Fesootai ina ia unaia pea le atinaeina o tupulaga talavou i le atunuu.
O loo faaalia ai i faamatalaga mai le Matagaluega e $149,250 lea ua faamatuuina mo le Faalapotopotoga o Tupulaga Talavou Samoa National Youth Council mo le faatinoina o galuega atinae mo tupulaga talavou a le atunuu i vaega e patino i Taitaiga, Aga Fesootai ma le atinaeina o tamaoaiga.
O lenei maliega na sainia e le Minisita o Tina ma Tamaitai, Afioga Mulipola Anarosa Ale Molioo ma le Sui a le faalapotopotoga Vaagi Kevin Schuster.
O le Faalapotopotoga o Tupulaga Talavou i Samoa o loo feagai lea ma le fesoasoani i tupulaga talavou i vaega e atinae ai o latou lumanai manuia e aofia ai le fesoasoani e unaia le itu tau galuega, faatinoina o polokalame auā le tomai ma agavaa o tupulaga talavou i soo se atinae ma faatautaia fonotaga ma faatalanoaga ina ia mautinoa e folasia mataupu o loo fai ma faafitauli i le lumanai manuia o tupulaga i le atunuu.
