O lenei feagaiga na sainia i le va o le Faalapotopotoga o Suesuega Faa-Saienisi i Samoa (SROS) ma le Polokalame o loo gafa ma le maketiina o faatoaga, lafumanu ma togalaau (PHAMA Plus) ina ia fesoasoani ai i galuega o loo faatino e i latou o loo galulue ai i lenei faalapotopotoga.
O le polokalame lenei o loo faatupeina e Ausetalia ma Niu Sila lea ua mafai ai ona faatino ai lenei feagaiga.
Saunoa le Sui Ofisa Sili o le faalapotopotoga, Fiso Pousui Dr. Fiame Leo o lenei faamoemoe o le vaega tāua lenei o auaunaga o loo latou faatinoina.
“E momoli le faafetasi i le PHAMA Plus ma i latou o galulue ai i le manatu mai i lo matou sao e ala lea i le faatinoina o suesuega e pei o le suesueina lea o le tulaga o le ‘ava ma le nonu, o vailaau o loo suesueina ai nisi o fua o faaeleeleaga ma nisi o vaega.”
O lenei faigapaaga na faavaeina i le tausaga 2011 ma e talitonu Fiso o le a siitia ai le tulaga o le tomai o le aufaigaluega e ala i le faatinoina o le galuega ma atina’e o faatoaga i le tulaga i le maketi.
“E unaia e lenei faigapaaga le galulue faatasi ai o le aufaigaluega aemaise a tatou faipisinisi ma faifaatoaga e mafai ai ona o latou iloa le tulaga i suesuega aemaise o auaunaga e mafai ona ofoina e le faalapotopotoga lenei.”
