O le faaiuga o le masina nei ma le masina o Fepuari e silia ma le 100 fanau aoga mai Ausetalia o le a malaga mai i le atunuu e faatino se tasi o polokalame faamasani i nisi o faalapotopotoga a le Malo o loo nafa ma auaunaga tau i le siosiomaga.

Ua mae’a faatino ai se sainigalima a le Iunivesite o Monash i Ausetalia faatasi ai ma le Ofisa o Suesuega Faasaienisi i Samoa nei o se tasi o paaga o lenei polokalame e faamautu ai lenei faamoemoe.

Saunoa Professor Sarah Macdonald mai le Iunivesite i Monash e tusa ai ma le amatalia o lenei polokalame i Samoa nei.

“O loo mafai ona matou faipaaga ai ma le Iunivesite o le Pasefika i Saute ina ia mafai ona faataunuuina lenei faamoemoe.

“O lenei polokalame e lua vaiaso e faagasolo ai o se auala e fesoasoani ai i fanau aoga e malaga mai ai i Samoa nei e silafia foi le tulaga o aafiaga o aafia ai le siosiomaga o le atunuu.”

O le autu o le polokalame lenei i Samoa o loo agai tonu lea i le tulaga o le saogalemu o mea taumafa ma le tulaga i faatoaga.

“O le a feagai ai fanau aoga nei ma semina o le a faatino, o aoaoga aemaise ai o le asiaina lea o nisi o faalapotopotoga o loo nafa ma auaunaga o loo iai le faamamafa i lenei faamoemoe.”

O le a mafai ai ona maua e nei fanau le tomai ma agavaa i vaega tau le siosiomaga o le Pasefika aemaise Samoa mo le faaauauina ai o le ola aotauina i aoaoga i Ausetalia.