A o sauni ai Hamilton e talimalo i le isi vae e sosoo ai o le taamilosaga lakapi taitoafitu a le HSBC, ua faailoa mai i le asō ua saini nei e le autaitoafitu a Niu Sila le atalii o le alii taalo iloga a Niu Sila o Carlos Spencer e na o le 18 tausaga le matua, le alii o Payton Spencer.

Ta’ua i lipoti o Payton sa taalo fulupeki i le ‘au a le Hamilton Boys First 15 ma ua saini nei lana konekarate 2 tausaga i le autaitoafitu.

Fai mai le faiaoga o le ‘au, Clark Laidlaw e lei tele se silafia o Payton i le taaloga taitoafitu ae o le a vave lava lana pue i le taaloga.

Faailoa foi e le alii talavou o lana mitii o loo iai ia alu i le Olimipeka e taalo ai i le lakapi 7 e pei lava foi o moemitiga a isi tama taaalo.

O isi tama taaalo e toalua ua saini foi i le fitu o Xavier Tito Harris ma Tepaea Cook Savage.