E lei maua lava foi si tina poo se tamaitai na tau sailia mai talu le po ole aso Lua, na lipotia lana taavale o poloka i tafega ile faaitu o Lismore I Niu Sau Uelese lava. O loo faailoa mai I lipoti lata mai o le tamaitai, Alina Brakel pei ona faailoa e le 7News o se tausi soifua i nofoaga o tagata matutua, 55 tausaga.
O lipoti ua taua ai na poloka lana taavale I tafega I le itu I saute o Lismore poo le ta o le 10 I le po o le aso Lua o le vaiaso nei. Ua faailoa le le fiafia o nisi ona o tulaga na iai lapataiga e faatatau I le tulaga o le tau I le vaiaso nei aemaise o poloaiga sa faailoa atu ina ia agai ese, evacuate, lea na toe faaleaogaina I ni nai itula mulimuli ane, ae toe faateia le toatele I le toe faamalosia atu o le agai ese I se taimi mulimuli ane ae ua maitauina le agai malosi atu o le vai.
Faailoa lagona mafatia o tagata I faatalanoaga I le aso ona ua toe faaleagaina foi galuega sa faatoa maea nei ona faatino atu talu leisi lologa faatoa maea ao lea foi ua toe oo I le tulaga lava lea e tasi. Ua valaau ai le toatele I le malo ua alaga tatau ona sii I luga le tulaga o taumafaiga mo se fesoasoani mo ia vaega o le setete. O loo lapataia pea le setete I le aso ma le agai atu I le faaiuga o le vaiaso I uiga louloua o le tau.
