Ua oo i le 20 sui faatutū ua momoli i le vaega faaupufai o le Faatuatua i le Atua Samoa ua Tasi, ae o loo tapena lea pati faaupufai i le fia maua o le aofa’iga e 31 o sui faatutū e tauva mo lana fu’a, e faaopoopo iai ma le 20 o itumalo o loo mau le lagolago a o latou sui faipule i le ta’ita’iga a le faipule o Gagaifomauga 3, ona atoa lea o itumalo faapalota e 51 o le atunuu aoao.
Ua faailoa lea tapenaga e le ta’ita’i o lea vaega faaupufai le susuga Laauli Leuatea Polataivao Fosi Schmidt i le fono masani ma tusitala, ma ua manino ai, o le to’aiva o faipule o loo i le Kapeneta lea sa faitau i le to’a luasefulu o loo i totonu pea o le faafaletui, ua lē o toe iai se faitauga e latou te tauaveina le fu’a a le Faatuatua i le Atua Samoa ua Tasi i le isi faigapalota.
O le itumalo o Vaa o Fonoti, lea o loo tula’i mai ai le tofa Mauu Siaosi Puepuemai o le minisita o le Matāgaluega o Fesoota’iga ma Faamatalaga Faatekonolosi, o lea ua iai lona sui tauva mo le FAST o le afioga Fuimaono Tui Vaitolo Ofoia.
Sa fesiligia e tusitala le ta’ita’i pe toe iai se avanoa e tauva ai mo le pati minisita e to’aiva o le Kapeneta sa faitau i le latou 29 o faipule o le latou faafaletui.
Le susuga Laauli Leuatea Polataivao Fosi Schmidt o le ta’ita’i o le pati faaupufai o le Faatuatua i le Atua Samoa ua Tasi.
O loo faailoa i upega tafa’ilagi a le vaega faaupufai o le faai’uga o le vaiaso na te’a nei na momoli atu ai le sui tauva faaolioli o le itumalo palota o Aleipata Itupa i Luga, o le afioga Taufua Tauā Edmund Taufua.
O le itumalo lea o loo seei mai ai i le nofoa le sui faipule o loo lagolagoina le vaega faaupufai e puipuia aiātatau a tagata.
