O le faaiuga o le vaiaso na tea nei lea na faatino ai le leitifoni a le Lakapi Samoa i Utulei Amerika Samoa e pei ona faasalalauina ai i luga o upega tafailagi.
Na amata i le taeao seia paia le itula e 6 i le afiafi ma e mae’a ifo lenei faamoemoe ua $20,877 tala Amerika ua taulimaina e le Iuni ae o loo taupati atu pea le mamalu o le atunuu e le gata i aiga, ekalesia, pisinisi ma faalapotopotoga aemaise ai le Malo e faaali lo latou lagolago i lenei faamoemoe.
O le auga o lenei sailiga ina ia faatupeina ai tapenaga a le ‘au tele a le atunuu le Manu Samoa 15 mo le Ipu a le Lalolagi lea e faia i le masina o Setema i Pale i Farani faapea ai le Manu Samoa taitoafitu o loo taumafai ai mo se avanoa mo Taaloga o le Olimipeka i Farani i le tausaga fou.
E pei ona saunoa ai le Peresitene a le Lakapi Samoa, Namulauulu Leota Sami Leota e momoli ai le faafetai tele i le aaofoai o le motu i la latou sailiga.
“E faaleo le agaga faafetai i la outou foai i le asō ona o le tou manatu i tamafanau a le atunuu o le mea moni ua le toe faigofie nei vaitau ae ona o le tou titifaitama ma lo outou manatu i alo ma fanau a Samoa.
“O lenei faamoemoe sa fauao faupo sa taumate pe tua ma ni ā a o lea ua outou tali faaaliali ua iu manuia ai lenei faamoemoe, faamalo le alofa e le lanu i sa matou upu e tuuina atu e sulaina ai lo outou agalelei.”
