Ua faasalalau ai nei e le komiti faatonu o le Faletupe Tutotonu o Samoa le avanoa e saili ai se faauluuluga poo le Kovana o lea faletupe o se meatotino a le Malo, ina ua toe faaopoopo ai le taimi galue o lē o loo avea ma Kovana i le taimi nei, le afioga Maiava Atalina Emma Ainuu Enari, seia mae’a i le masina nei o Novema e faatali ai le isi filifiliga.
O le afioga Maiava Atalina na uluai avea ma Kovana o le faletupe tutotonu i le masina o Aokuso o le tausaga 2011 ma o ia le uluai tamaitai na filifilia i le tofiga i le silia ai i le 25 tausaga o galue i lea auaunaga tāua a le Malo.
E ono tausaga le umi o le konekarate mo lea tofiga ma o le tausaga e 2017 na toe filifilia ai i se fautuaga a le taitaifono ma le komiti faafoe o le Faletupe tutotonu lea na tuuina atu i le kapeneta i lea vaitau.
Peitai ua lipotia e le vaega faasalalau o le Talamua o lea filifiliga sa iai se lape i le lē tausisia o ala faaletulafono, ma ua logosaia ai e le Kovana le fautuaga a le Loia Sili, sa iai se lape na aafia ai lea faaiuga.
O le avanoa o le Kovana o le faletupe tutotonu e pei ona faasalalau, e tapunia tusi talosaga i le amataga o le masina o Tesema.
