E lua tofiga faalefaavae poo constitutional appointments o loo avanoa nei mo le toe sa’ilia o nisi e iai tomai ma agavaa e tauave ai ia tofiga, e aofia ai le Su’etusi Sili a le Malo ma le Komesina o Sulufa’iga.
Talu ona faamavae le ulua’i tama’ita’i sa tauaveina le tofiga Komesina o Sulufa’iga le afioga Luamanuvao Katalaina Sapolu i le masina o Iuni o le tausaga e 2023, e oo mai i le taimi nei e le’i maua se isi e tauaveina lea tofi maualuga i le malo.
O lea o le a toe faasalalau le avanoa o le Komesina o Sulufa’iga e pei ona faailoa e le Palemia i le amataga o le vaiaso nei i le feiloa’iga ma tusitala, ma ua toe tatala ai ia i latou sa talosaga muamua ma nisi o fia maua lea avanoa e tuuina atu tusi talosaga.
O le tofiga o le Su’etusi Sili a le malo ua mae’a le taimi galue o lē sa tauaveina, le afioga Fuimaono Camillo Gafatasi Afelē, o ia le ulua’i Su’etusi Sili na amataina le taimi galue e 12 tausaga le umi e pei ona sa teuteu ai le faavae i ni tausaga ua mavae ma pasia e le Palemene lea suiga.
O le tausaga na te’a nei na mae’a ai le taimi galue o le afioga Fuimaono Camillo.
O se tasi lea o tofiga faalefaavae o le a faasalalau mo nisi e talosaga iai.
