A o iai pea vaaiga i le uafu i Salelologa o vaafagota e tolu na faatama’ia talu ai nei i le malaia poo le afi, ua sa’ilia nei e le pulega o uafu ma taulaga se kamupani e ala i se tauofoga, e mafai ona tapenaina se fuafuaga mo le aveesea o ia vaafagota mai le uafu i Salelologa.
Ua mana’omia ai se auaunaga e iai le tomai ma le silafia i se faiga e faatā’ape ai tino o ia vaafagota, ma ave e lafoa’i i se nofoaga saogalemu e lē aafia ai le si’osi’omaga.
O Ianuari o le tausaga fou pe a toe a’e uma galuega a le malo, o le a faatino ai le faatau ese atu o vaafagota e le’i afaina i le mu, lea foi o le a faatautaia e le pulega o uafu ma taulaga.
O ia vaa o ni meatotino a se kamupani Saina o loo lesitala i le atunuu o Vanuatu.
O Fepuari o le tausaga fou 2025 e tula’i ai i le faamasinoga o tupulaga talavou le tamaitiiti e 13 tausaga le matua ua molia e leoleo i lona susunuina o vaafagota ua sa’ilia nei se kamupani e aveesea mai le uafu i Salelologa ma lafoa’i i se nofoaga saogalemu.
