E tatau ona faaoo uma atu i le faamasinoga i le Aso Lulu o lenei vaiaso folasaga ma finauga tusitusia a loia o loo aofia i le tagi tau palota mai Falealili 1, a o le’i oo i le Aso Tofi o le vaiaso lava lenei e su’esu’eina ai lea matāupu o loo molia ai i faiga faaālatua le sui faipule o Falealili 1 o le afioga i le Sui Palemia.
O loo molia foi e le afioga Toelupe Maoiautele Poumulinuku Onesemo le sui sa la tauva o ia e ana le tagi le tofa Tuiloma Tusa Laniselota Lameko i tuua’iga foi o faiga faaālatua i le faaaogā o tupe e faatosina ai tagata palota.
O le Aso Gafua o le vaiaso lenei na toe fofogaina ai le matāupu lenei i le faamasinoga o palota o loo seei ai le afioga i le Faamasino Sili ma se tasi o faamasino o le Faamasinoga Maualuga.
Ua faailoa ai i ia taualumaga afai e lē maua molimau e to’alua o loo sa’ilia pea e leoleo o le a faaaogā loa mau tusitusia ua mae’a tuuina atu a ia tagata e lima ta’ita’iina ai su’esu’ega a le faamasinoga.
O tuua’iga o loo faailoa i mau tusitusia o loo lagolagoina e le molimau e to’atasi mo le itu tagi na oo atu i le faamasinoga i se tasi o valaauga o le tagi tau palota lenei i le masina o Tesema o le tausaga na te’a nei.
O taualumaga foi o lenei matāupu i le amataga o lenei vaiaso sa faailoa ai e le loia o le ofisa o le Loia Sili o loo tula’i mo le ofisa o faigāpalota o loo faaauau pea sa’iliga i molimau e to’alua o loo iai le tusi saisai na faatonuina e le faamasinoga, ma ua mautū foi i sa’ili’iliga a le vaega o le ofisa o femalagaa’iga a le malo o loo iai pea i Samoa molimau o loo mana’omia.
O le alii loia o Alex Su’a o loo tula’i mo le itu tagi, ae o le tama’ita’i loia o Miruel Lui o loo finauina le tetee a le sui faipule.
