O loo taumafai leoleo i le faaitu i Palmerston North e saili le tagata lea na ta’ua i molimau a nisi faapea sa taumafai e tau mailei pe faalata ni tamaiti i totonu o lana van lanu pa’epa’e.
E lua lipoti na oo ane i leoleo i lea faaitu o ni gaioiga a se tagata lea na masalomia sa ia taumafai ai i le Aso Lua o le vaiaso talu ai e fai i le Botanical Rd i le va o le 2.45pm ma le 3.15pm.
O loo ta’ua i le NZ Herald se faamatalaga a se tasi o sooupu a leoleo e faapea, ‘E toalua ni tamaiti na vaaia o talanoa atu i ai le alii lea e foliga na alu ane i le van lanu pa’epa’e.’
‘Na liptoa faapea na fai lenei alii i le isi tamaitiiti e oso i totonu o le van, ae na sosola ese tamaiti ma e leai se lipoti o se isi na afaina pe faamanu’alia ai.’
O loo talosaga mai leoleo i le mamalu o le atunuu i lea faaitu ina ia faaoo atu ia i latou ni faamatalaga e faamautinoa ai le mea na tupu.
O loo moomia poo ai lava se isi na pue ni ana ata mai lena vaipanoa i le Botanical Road i le Aso Lua o le vaiaso talu ai, ina ia fesootai atu i leoleo, pe lē ono maua ai nisi faamatalaga o lenei mataupu.
O loo fautua mai leoleo, ‘O ituaiga gaioiga nei e ono faapopoleina ai, ae o loo augani mai leoleo ina ia mataala ae aua le soona popolevale.’
E mafai ona vili le 105 poo le itulau i luga o le upega tafailagi a leoleo, ma tuu i ai le numera 230510/3058.
E mafai foi ona tuuina atu faamatalaga e aunoa ma le faailoa o lou suafa e ala atu i le Crime Stoppers i le 0800 555 111.
