E lei sala ese se lagona i sa’afi’afiga a sui faipule uma o le Palemene a Niu Sila i le aso ananafi, a o latou toe tomanatu ma sa’afi lagona ootia ma moomooga fia mafuta pea, i si o latou uso faipule, o lē na faafuase’i ona motusia le mafutaga ona o le malaga a le maliu ma le oti.
Ua lua ai nei masina talu ona tuumalo faafuase’i le alii Faipule a le vaega faaupufai a le Greens, Afioga Faanānā Efeso Collins, a o auai atu i le faatinoga o se sailiga seleni sa faia i le aai i Aukilani.
Sa toe sa’afi sui faipule ma o latou ta’ua le telē o se aafiaga lelei na amata fofola e Faanānā, e lē gata i totonu o le Palemene ina ua amata faatino ona tiute faafaipule, ae faapea foi i tua i vaega eseese sa ia tautuaina ai le atunuu aemaise lava i Aukilani i Saute o loo toatele ai tagata Pasefika ua leva ona latou mafuta ma faasafua iai ana galuega fesoasoani i gaioiga faatino tainane uiga alofa ma faaleuo.
Na sa’afi lona uso faipule mai le latou vaega faaupufai a le Greens, Teanau Tuiono, ma ia manatua ai Faanānā i ona uiga ma ana suaga mālie (sense of humour), ma ia ta’ua ai le maumaua’i o Faanānā e taulai atu lana tautua i ona tagata Pasefika.
Saunoa le alii minisita o le National, Shane Reti, e matuā telē le misia o Faanānā e lē gata i totonu o le Palemene ae i le atunuu atoa, aemaise lava i Otara.
A o sa’afi Reti na ia ta’ua ai, ‘o Faanānā o se alii na te faatāua ma malamalama i faalogona o soo se ituaiga o tagata (man of the people) ma sa mitamita i lona faasinomaga o ia o se tamafanau a le Pasefika’.
O le tuumalo faafuase’i o Faanānā ua peiseai ua muta faafuase’i ai se soifuaga faapolokiki ua maoa’e lona tulai mai.
Ina ua sa’afi lē sa avea ma Palemia o le atunuu i le paeaiga talu ai nei, Hon Chris Hipkins, na te manatua le taimi na fesiligia ai Faanānā e le RNZ poo le ā se mea e manao ai mo le Kerisimasi, ma o lana tali, “Ou te faamoemoe ia maua uma e tagata o lo tatou atunuu nisi o manaoga autu, ia ala a’e le tamaitiiti i aso taitasi ma lona mautinoa, e maua uma e ia ana ‘aiga e tolu o le aso, e iai lona fale e nofo ma saogalemu ai ma mafanafana lelei lona moega e moe ai i le po.”
Saunoa Hipkins, “Ou te iloa o le mea lena sa naunau e tuu atoa iai loa soifua auauna na te faia.”
Na sa’afi ma loimata le tamaitai faipule o le Labour, Hon Barbara Edmonds a o ia ta’ua ai o lo latou manatu ia Faanānā o ia o “se augātamā”, ma o le a latou faaauauina pea galuega na amata mai e lo latou tuagane, se uso, poo lo latou augātamā.
Sa aotele e le alii faipule o Willie Jackson ana sa’afi’afiga mo Faanānā i le faapea mai, o se tamalii e “mati’e ona lagona faaletagata, e toa lona loto ma telē lona atamai”.
I sa’afi’afiga a le tamaitai faipule o le National, Erika Stanford, na ia saunoa ai, o Faanānā o se tagata na soifua mai ina ia tulai i luma o tagata e alaga e taimua ma taulamua i meafai, ae pe a e feiloai totino ia Faanānā e te lē iloa atu ai lena mea ia te ia auā o se tagata e nofosauni e ua’i lelei mai ma faalogologo mai ia te oe.
Na faaaogā e le ta’ita’i lagolago o le Te Pati Māori, Rawiri Waititi lana gagana, le te reo Māori e momoli ai ana sa’afi’afiga.
Saunoa le Faipule o le ACT, Simon Court, o le soifuaga o Faanānā o se faamaoniga ola lea i agatausili o le filemu, le alofa ma le soifua auauna.
O le tamaitai Faipule o Jenny Marcroft na sa’afi e fai ma sui o le NZ First ma na momoli sa’o ana upu i alo tamaitai o le Afioga Faanānā, ma faalautele ai lana talanoa i aafiaga o lagona faavauvau.
O ana upu i alo o Faanānā, “Tau ina ia lua fetausia’i le tasi i le isi, ma ia lua faaauauina galuega lelei a si lua tamā.”
Puna o Faamatalaga: https://www.rnz.co.nz/news/political/515574/a-man-of-the-people-mps-pay-tribute-to-fa-anana-efeso-collins
